kabgay sa zakat

Zakat Al-Fitr Sagintas a Ika-8 Siiko Zakat al-Fitr [kapitra] So Zakat al-Fitr – [maana so kapitra] na paralo a inipaliyogato Rasulollah [Sallallaho Alaihi Wa Sallam] siiko kamboka phoon ko Ramadhan. Pitharo o Abdullah bin Omar [RadhiAllaho Anhoma] a ped sa maana niyan: “Piyaralo o Rasulollah [Sallallaho Alaihi Wa Sallam] so kapitra phoon ko Ramadhan siiko oripen agoso mapiya a taw agoso datu agoso bai agoso wata a mayto agoso matoa ko manga Muslim”. [Muttafaqun Alaihi]. A giyai so isaka gantang a pangenengken a ped ko nganin a pagepero o manga taw. Pitharo o Abo-Said Al-Khudri [RadhiAllaho Anho]: “Aya betad ami siiko masa o Rasulollah [Sallallaho Alaihi Wa Sallam] na ipembegay ami ko gawii a boka so isaka gantang a pangenengken ago ayawto a pangenengken ami na Shaiir [bantad], zabib [raisin-miyagango a anggor], ago aqit [dried yogurt-miyagango a ped sa gatas], ago korma”. [Piyanotolo Bukhari]. Na di khapakay so ped sa pirak agoso kasangkapan agoso nditaren agoso pangenengkena pangangayamen, agoso pagigimo agoso manga salakaw ron ka sabnara miyasopak iyan so nganin a kinisogoonon o Nabi [Sallallaho Alaihi Wa Sallam]. Ago sabnara pitharo o Nabi [Sallallaho Alaihi Wa Sallam] a ped sa maana niyan: “Saden sa taw a nggalebek sa amal a di ped ko sogoan ami na di tharimaan.” [An- Nawawi]. Maana di rekaniyan tharimaan. Ago aya arangan a kala angkoto a isaka gantang na 2.40 kilogram ko mapiya wheat. Giyai kala a giyangkoto a isaka gantang a Nabawi a diniyangka o Nabi [Sallallaho Alaihi Wa Sallam] a mipepitra. [Imanto na siisa Saudi na ndadakel ko manga padian - supermarket - a titibhabaan a 3kilogram a mapiya a margas a gii pitraan]. Ago wajib so kibegan ko pitra ko onaan pen o daon kakotbai [Salat al-Eid] ago aya taralbi na so kibeganon siiko gawii a boka ko onaanpeno daon pen kakotbai ago miyapakay a aya kibeganon na siiko salongan odi na dowa-gawii pen a daon kabokai. Ago di khapakayo ba aya kibeganon na siiko oriyano kakotbairon sa kiyatharo awno Ibn Abbas [RadhiAllaho Anhoma] a mataan kon a so Nabi [Sallallaho Alaihi Wa Sallam] “na piyaralo niyan so kapitra a gii soti o giipuasa phoon ko piyakasisingay a galebek agoso manga reresik a katharo ago pagana ko manga miskin, na saden sa taw a itonay niyan ko daonpen kasambayangi [kakotbai] na sekaniyan na zakat [pitra] a tiyarima ago sa taw a itonay niyan ko oriyano kiasambayangiron [kakotbairon] na sekaniyan na sadka a ped ko manga sadka (maana kenao ba pitra).” [Piyanotolo Abu- Dawood agoso Ibn Majah]. Inonta na amay ka so taw na da niyan katokawi o ba boka inontabo ko oriyano kiyakotbairon odi na sii sekaniyan matatago ko mawatan sa kaingedan [a daa mipepitra iyan odi na daa kapepitraan iyan] siiko kimbeganon odi na sii sekaniyan matatago ko darpa a daa kapapatonanon a khabegan iyanon na miyapakaya aya kibegan iyanon na siiko oriyano kakotbairon a kakhaparowi niyanon.