phakapoon o mga shia

PAKAPOON A SHIA ﺑﺴﻢ ﺍﻟﻠﻪ ﺍﻟﺮﺣﻤﻦ ﺍﻟﺮﺣﻴﻢ Sii ko kiyawapat o Nabi (sal lallaho 'alaihi wasallam) na miyatimo so manga Sahabah sii ko darpa a gii pulimolimodan o manga Bani Sa'edah. Na aya kiyaompongan kiran roo a initoro iran a Khaleefah (ulowan) na so Abubakr (Radiyallaho 'anho). Na so 'Ali Bin Thalib na aya sabap a da niyan kapakapud sa giyoto a kiyalimod o manga Sahabah na sii suka niyan miyataman ko gii kapuriparadowa ko kapurigoa ago kipulubungun ko bangkay o Nabi (sal lallaho 'alaihi wasallam). Na oriyanoto na miyakaayon suka niyan bo ko kiyabaloy o Abubakr a Khaleefah (ulowan) o manga muslim sa giyoto a masa. Sii sa giyoto a masa na adun a manga tao a aya panarima iran na aya kon a patot a khabaloy a Khaleefah na so 'Ali (Radiyallaho 'anho) ka sabap sa mas madasug o Nabi Adi so Abubakr, go miyakamongon, ago so salakaw san a manga sabap. Sii ko masa a kiyapakathondog o Abubakr, go Omar ago so Uthman sii ko kapagolowan na dadun a bagur o manga tao a di maka-aayon ko kiyabaloy o Abubakr a Khaleefah. Na sii ko kiyabaloy o 'Ali (Radiyallaho 'anho) a Khaleefah ko oriyan o kiyawapat o Uthman na pipho- onan o manga tao a maampil ko 'Ali (Radiyallaho 'anho) a kapuphakalangkapa iran ko manga tindug iran, a pago- olowanan siran a yahudi a so Abdullah Bin Saba’, a badi so 'Ali (Radiyallaho 'anho) na di kiran maka-ayon ago pukhararangitan iyan siran. Aya mga Dalil sa kapukhararangiti kiran o 'Ali na piyamakitotong iyan siran sa apoy. na aya masikaw ron sa ginawa na babadun miyamagomarug a kadadadag o mga shia, ka aya pitharo iran ko 'Ali na: "Suka so Tohan, ka aya bo a puphaniksa sa apoy na so Tohan." giyoto i sabap a adun ko mga shia a bayran badun piyangintohan so 'ALI (Radiyallaho 'An-ho). Sii ko oriyan o kiyawapat o 'Ali (Radiyallaho 'anho) na maito maito na puphakabagur so tindug o manga tao a maampil mamanti ruka niyan. Sa taman sa bithowan iran a manga ginawa iran sa manga Shia (maana a manga salinggogopa ago mga ingumpuda siran kon o 'Ali). So manga Shia na adun a manga Imam iran a miyakatondotondog. Na omani pizakatawan ko manga Imam iran na adun a tindug iyan a dii niyan gipanolon. Kataya so saba-ad a tindug ago paratiyaya o manga Shia a minisopak iran ko manga Ahlussunnah (manga Sunni): Ini itong o manga Shia so katundo sa Imam (Ulowan) a pud ko manga rokon o Agama Islam. Aya paratiyaya o manga Shia na so manga tao a iniitong iran a manga imam (ulowan) iran na palaya siran kon makalilidas ko karibat (maana a di phangariribat), go katawan iran kon so migagaib ago so phakatalingoma, go katawan iran so masa a kaphatay ran. Aya paratiyaya o manga Shia na so Nabi (sal lallaho 'alaihi wasallam) na inithanan iyan a aya khaleefah na so 'Ali, kunaba so Abubakr ago so salakaw ron. Giyanan i mala a sabap sa gii katharoa o manga Shia a so kon so Abubakr, go Omar ago Uthman na liyalim iran so 'Ali sii ko Kadato. Papakayn o manga Shia so kapangaroma sa temporary (Temporary Marriage). Na aya tindug o manga Ahlussunnah na Haram so Temporary marriage ka inisapar o Nabi (sal lallaho 'alaihi wasallam). Papakayn o manga Shia so TAQIYYAH (kiputhapokun o tao ko bunar sii ko sopaka iyan sa tindug). Adun ko manga Shia a mas pakalulubii niran so manga imam iran a di so manga Nabi ago so manga Malaikat. Paparatiyaan o manga Shia a kapakapumbalingan o babaloy niran a manga imam iran sii ko pukhaori a masa. Aya kon a sabap na iphangokom iran so bunar sii ko manga manosiya. Adun a miyatoon ko manga ulama a manga Shia a aya panarima iran na miyaribat kon so Jebreel ko kinitoronun iyan ko Qur-an. Ka aya kon a patot a thoronan iyanon na so 'Ali, kunaba So Mohammad (sal lallaho 'alaihi wasallam). Aya paratiyaya o manga ulama a Shee'ah na so Qur-an na piyangalulubatan ago piyangaomanan. na so manga Ahlussunnah na aya paratiyaya iran na so Qur-an na da kalubati ago da kaomani, sabap sa inidiyandi o Allah a kaziyapa niyanon. na sabap sa inidiyandi o Allah a kaziyapa niyanon na didun khalubatan so Ayat iyan ago didun khaomanan. Sadun sa tao a aya paratiyaya niyan na kalulubatan so Qur-an odi na kiyapangomanan na miyakafer suka niyan sii ko tindug o manga Ahlussunnah. So saba-ad a manga Ala a Ulama o manga Shia na isosogo iran so kizintaan ko manga Sahabah, batabolabaw ron so manga ala ko manga Sahabah, datar o Abubakr, Omar, Uthman ago so manga karoma o Nabi. Aya tindug o manga Ahlussunah na khakafer so tao a gii niyan dizinta so manga Sahabah o Nabi (sal lallaho 'alaihi wasallam). Adun a miyatoon ko saba-ad a manga Shee'ah a iniitong iran so 'Ali sa Tohan. na Sadun sa aya paratiyaya niyan na aya tohan na so 'Ali na miyakafer sii ko tindug o manga Ahlussunnah. So manga Shia na pakararataa niran so pat a manga Imam ( Abuhaneefah, Malik, Shafii, Ahmad) a phagonotan o manga Ahlussunnah ago so salakaw kiran a manga ala a Ulama, datar o Imam Al-Bukhari. Aya phakaoriyango sii na pagarapungo ko manga Shia a kausara iran ko akal iran a inibugay kiran o Allah, go so kapakalaa iran ko research iran ko manga kitab a tawheed, ka inshallah na thoroon o Allah so manosiya a mananagontaman sa katoona niyan ko lalan a mauntol. Di kano pukhisowasowa ko manga ulama iyo a manga Shia ka puzapunga niran so bunar. Sii kano onot ko manga ulama a Ahlussunnah ka siran i madakul. aya katharo Nabi na: "ﺍﺗﺒﻌﻮﺍ ﺍﻟﺴﻮﺍﺩ ﺍﻷﻋﻈﻢ." "Aya onoti niyo na so Kadakulan". ﻭﺁﺧﺮ ﺩﻋﻮﺍﻧﺎ ﺃﻥ ﺍﻟﺤﻤﺪ ﻟﻠﻪ ﺭﺏ ﺍﻟﻌﺎﻟﻤﻴﻦ.