Kapnai haiji tlo a okit iyan

So kapnaihadji na tlo a okit iyan: 1. Hajj Tamattu 2. Hajj Kiran 3. Hajj Ifrad Aya petharoon a Hajj Tamattu na so kapagihram sa aya peniaten na Umrah, sii ko manga olanolan a Hajj , iphoon ko paganay ko Sawal na taman ko kasbang o Fajr ko gawii a ikasapolo ko Zol-Hajji, sa pagimasaden o naihadji angkoto a Umrah, na orianiyan na phagihram saroman, sa aya peniaten iyan na Hajj , sa sii den phagihram sa Makkah, odi na so marani ron a darpa sii ko gawii a Tarwiyah (ika walo ko Zol-Hajji) sangkoto a ragon a kiyapagumra niyan. Aya petharoon a Hajj Kiran na so kapagihram sa aya peniaten na Umrah ago Hajj sa merengan, sii ko manga olanolan a Hajj, sa di phakakekang so naihadji sa ihram, inontabo sii ko gawii a kapekorban (ikasapolo ko Zol-Hajji), odi na aya ped a okit iyan na phagihram sa aya peniaten iyan na Umrah, sii ko manga olanolan a Hajj, na orianiyan na izold iyanon so kapeniata niyan ko Hajj, sii ko da niyan pen kapakathawaf sa Tawaf a Hajj. Aya petharoon a Hajj Ifrad na so kapagihram sa aya peniaten iyan a paganay na Hajj, sii ko manga olanolan a Hajj, sa sii pekawa ko mikat, odi na sii den sa walay niyan amayka mao- onaan o mikat, odi na sii sa Makkah amayka mababalingon, orianiyan na makapagi-ihram den sa taman sii ko gawii a kapekorban, amayka sekaniyan na ana mapekorban iyan, amayka da a mapekorban iyan na inisogoon so kabarengkasa niyan ko niat iyan a Hajj, sa mbaloyin a Umrah, kaan mabaloy a Hajj Tamattu, sa makapethawaf ago makapeza’ey, nago katepedan iyan so bok iyan, nago phakakekang sa ihram, sa datar o kinisogoonon o Nabi (r) ko siran oto a aya inipagihram iran na Hajj Ifrad a da aba iran mapekorban. Sa datar den anan so aya inipagihram iyan na Hajj Kiran, a amayka da aba niyan mapekorban na inisogoon so kabarengkasa niyan ko niat iyan a Hajj Kiran, sa mbaloyin a Umrah, sabap sangkoto a miya-aloy tano. Aya mapiya a kapnaihadji na Hajj Tamattu, sii ko tao a da aba niyan tonda a mapekorban iyan, ka kagiya so Nabi (r) na giyanan i inisogo iyan ko manga sahaba niyan ago tiyangked iyan kiran. Amayka seka na aya inipagihramka na Hajj Tamattu odi na Hajj Kiran, na miyawajib reka so kasombali sa Hadi (pekorbanen) sii ko gawii a ikasapolo ko Zol-Hajji, a satiman a kambing odi na ikapito bagi ko satiman a onta, odi na ikapito bagi ko satiman a sapi, sa amayka da a miyatoonka na miyawajib reka so kaphowasa sa sapolo gawii, tlo gawii ko masa a Hajj, na pito gawii ko kapakandod ka ko manga pamilyangka. Ogaid na aya thomo na so kapowasaingka ko tlo gawii ko onaan o kapagokop sa Arafa, sa o powasaingka ko tlo gawii ko oriyan o boka na da a karata iyan.