ropaan o psujudan

ko psojodan. Na aya ikidiya ko mga kmr a Lima ago so mga kmr a ski sii ko masa a kapakasosojod o manosiya na phaka-adapn sa Qiblat, na so mbala a Ski na pakapmblagn sa diyangka a Sarangkao o Manosiya, na so mga Kmr a Lima na pakapnddkta-an sa knaba pakapmbblablaga, na so Tiyan na iphoro ka pagawatn ko Bobon, ago so mbala a Siko na pagawatn ko mbala a Kilid. Giyanan i Ropa-an a Kasojod o Nabi (S). Na so Bai na aya Makallbi rka niyan a Kasojod na Midkt iyan a Tiyan iyan sa Bobon iyan, go so mbala a Siko niyan na Midkt iyan ko mbala a Kilid iyan. Na aya pmbatiya-an sii ko Sojod na: سبحان ربي الأعلى و بحمده Sub-haana Rabbiyal A’laa wa Bihamdihi (3X) Miya-aloy Tano a aya ipagona Tomana sa Baba sii ko kasojod na so mbala a Lb na gobo so mbala a Lima. Giyanan i Tindg o kadaklan ko mga Ulama na samporna ko Tlo a Madhab: Hanafi, go Shafi’i, go Hambali. قال الإمام الترمذي: "والعمل عليه عند أكثر أهل العلم يرون أن يضع الرجل ركبتيه قبل يديه...". Pitharo o Imam Termidhie: “Giyanan i Titindgan o Kadaklan ko mga ulama a dapat na Miyona da-an Tomana o Manosiya so mbala a Lb iyan (igira a Sojod) na mapasad na gobo so mbala a Lima niyan…”. قال الخطابي: "إن تقديم الركبتين أثبت من تقديم اليدين ، وبه قال أكثر العلماء ، وهو أرفق بالمصلي و أحسن في الشكل و رأي العين". Pitharo o Al-Khattaabie: “Mata-an a so Kiyona-an Tomana ko mbala a Lb (Sii ko kasojod) na aya Mabagr (Correct) adisa aya ipagona tomana na so mbala a Lima, go giyanan pn i Titindgan o kadaklan ko mga ulama (a giyanan a aya ipagona Tomana na so mbala a Lb na gobo so mbala a Lima), go san kallbodi so tao a gii zambayang, go giyanan i mapiya i Bontal a Kasojod, go aya mas mapiya a Phagilayin”. Na so Kiyona-an Tomana ko mbala a Lima na Knaba Phakabatal ko Sambayang na ogaid na Makrooh (Pakagogowad) a Kiyokomanon o mga Imam/Ulama!. na isa dn ko mga Ulama a komiyokomon sa Makrooh na so Imam Shafi’i ago so salakaw rka niyan. Na aya mitindg sii ko aya ipagona Tomana na so mbala a Palada Lima na go bo so mbala a Lb na so Imam Malik a ska niyan so Imam ko Madhab a Maliki, na Ogaid na aya ilayan san o kadaklan ko mga Ulama a Datar o Tlo a Madhab (Hanafi, Shafi’i, Hambali) sa Tindg anan o Imam Malik na Ribat odi na Malobay!. Naino ka pagalowin tano bo so Dalil o Imam Malik, go pagalowin tano so Dalil o tlo a Madhab a raks a pagalowin tano so inismbag o Tlo a Madhab ko Dalil o Imam Malik. MGA DALIL O TLO A MADHAB (HANAFI, SHAFI’I, HAMBALI) KO TINDG IRAN A AYA IPAGONA TOMANA NA SO LB NA GOBO SO LIMA: حديث وائل بن حجر قال: "رأيت رسول الله صلى الله عليه وسلم إذا سجد يضع ركبتيه قبل يديه." رواه أبو داود و الترمذي و ابن ماجه و ابن خزيمة في صحيحه و ابن حبان في الصحيح. Pitharo o Wail Bin Hujr: “Miyailay akn so Rasoolullah (S) a igira a Sojod na aya iphagona niyan Tomana na so mbala a Lb iyan na go bo so mbala a Lima niyan.” Piyanothol o Abudawood, go Tirmidhi, go ibn Majah, go Ibn Khuzaimah, go Ibn Hibbaan. و عن وائل بن حجر أيضا: "أن النبي صلى الله عليه وسلم كان إذا أراد أن يسجد وقعت ركبتاه قبل يديه". رواه أبو داود و ابن المنذر وهو حسن بل صحيح بالشواهد. Miyatharo pn o Wail Bin Hujr: “Mata-an a so Nabi (S) na igira a Sojod na pkhauna Tomana so mbala a Lb iyan adi so mbala a Lima niyan.” Piyanothol o Abudawood ago Ibnul-Mundhir. قال الإمام ابن المنذر في (الأوسط) (3/166): "و حديث وائل بن حجر ثابت و به نقول." Pitharo o Imam Ibnul-Mundhir: “So Hadith o Wail Bin Hujr na Mabagr ago aya mi Titindgan.” عن أبي هريرة رضي الله عنه قال رسول الله صلى الله عليه وسلم: "إذا سجد أحدكم فلا يبرك كما يبرك البعير". رواه أبو داود و النسائي و غيرهما. Miyakathitayan ko Abu-Hurairah (Radhiallahu anhu), Pitharo o Rasoolullah (S): “Igira a Sojod so isa rkano na di niyan sowaa so Lagid o Kaplko o Unta”. Piyanothol o Abudawood ago Al-Nasaae. [Osayan] Aya siyabot sa Hadith anan na inisapar o Nabi (S) iba tano psojod sa Lagid o kaplko o unta! Na so unta na aya Kalko niyan na iphagona niyan daan Tomana so Tomampar sa Una-an a aya Pantag iyan sii ko manosiya na so mbala a Lima niyan, na go bo so mbala a Lb iyan. na giyoto i sabap a aya Pando-an o Nabi na Sorangn tano so Kalko a unta sa dapat na aya miyona tano daan Tomana igira a Sojod tano na so mga Lb tano na gobo so mga Lima tano ka giyanan i kakhasoranga tano ko ropa-an a Kalko a unta. عن الأسود النخعي قال: "إن عمر كان يقع على ركبتيه". رواه ابن أبي شيبة في المصنف بإسناد صحيح. Miyakathitayan ko Al-Aswad Al-Nakh’ie a pd ko mga Tabi’een: “Mata-an a so Omar Bin Al-Khattab –Radhiallahu anhu- na (aya kasojod iyan na) iphagona niyan (tomana) so mbala a Lb iyan.” Piyanothol o Ibnu Abi Shaybah. عن عبد الله بن مسلم بن يسار: "أن أباه كان إذا سجد تقع ركبتاه ثم يداه ثم رأسه". رواه ابن أبي شيبة بإسناد صحيح. Miyakathitayan ko Abdullah Bin Muslim Bin Yasaar a Mata-an a so Ama iyan na igira a Sojod na pkhauna daan Tomana so mbala a Lb iyan na mapasad na so mbala a Lima niyan na go bo pman so ulo niyan.” Piyanothol o Ibnu Abi Shaybah. عن إبراهيم النخعي أنه سئل عن الرجل يضع يديه قبل ركبتيه فكره ذلك و قال: "هل يفعله إلا مجنون" !!!. So Ibraheem Al-Nakh’ie (Died 96 H) a pd ko mga ulama ko mga Tabi’een, na inipakaiza-on o Tonai kokoman iyan ko sakatao a Mama a aya kasojod iyan na iphagona niyan daan Tomana so mbala a Lima niyan na go bo so Mbala a Lb iyan. na Da uto kasowatn o Ibraheem Al-Nakh’ie a Lagid oto a Kasojod, a raks a Pitharo iyan: “Da a psowa sa Lagid oto a Kasojod a Rowar sa Pkhamiyamiyat !!!”. DALIL O TAO A AYA TITINDGAN IYAN SII KO KASOJOD NA IPHAGONA NIYAN DAAN TOMANA SO LIMA NIYAN NA GOBO SO LB IYAN: عن أبي هريرة رضي الله عنه قال رسول الله صلى الله عليه وسلم: "إذا سجد أحدكم فلا يبرك كما يبرك البعير ، وليضع يديه قبل ركبتيه". Miyakathitayan ko Abu-Hurairah (Radhiallahu anhu), Pitharo o Rasoolullah (S): “Igira a Sojod so isa rkano na di niyan sowaa so Lagid o Kaplko o Unta, na aya Una-an iyan tomana na so mbala a Lima niyan na gobo so mbala a Lb iyan.” Giyanan i Dalil o Tao a aya iphagona niyan Tomana na so mbala a Lima niyan na gobo so Mbala a Lb iyan!. Aya inismbag san o mga Ulama na giyanan a Hadith na dowa ka Sentence: Paganay a Sentence: “Igira a Sojod so isa rkano na di niyan sowaa so Lagid o Kaplko o Unta”. Aya ikadowa a Sentence: “na aya Una-an iyan tomana na so mbala a Lima niyan na gobo so mbala a Lb iyan.” Giyanan a paganay a Sentence na Correct, na so ikadowa a Sentence na Ribat odi na Malobay! ka sabap sa aya kiyapo-onan anan a Panonothol na si Al-Daraawardie (الدراوردي) a kiyokom o mga Ulama sa Malobay ska niyan a Panonothol. Taman ko mala a Imam o mga Salafi a si “BinBaz” ago “Ibn Al-Qayyem” na Pitharo iran a giyanan a ikadowa a Sentence na knaba Sompat sa paganay anan a Sentence ka minipagomanon anggolalan sa Karibatan o saba-ad a mga Panonothol. Kataya so Kiyokoman o mga Imam ki Al-Daraawardie: قال أبوحاتم: "لا يحتج به". Pitharo o Abuhaatim: “(Si Al-Daraawardie) na di khakowa a Dalil”. قال أبوزرعة: "سيء الحفظ". Pitharo o Abuzar’ah: “(Si Al-Daraawardie) na marata i katanod (Memory)”. قال النسائي: "ليس بالقوي". Pitharo o Al-Nasai: “(Si Al-Daraawardie) na knaba Mabagr (i Memory)”. قال الإمام أحمد: "إذا حدث من حفظه جاء بالبواطيل". Pitharo o Imam Ahmad: “(Si Al-Daraawardie) na igira a miyamanothol a poon ko memory niyan na aya diniyan gimapamanothol na mga Ribat”. Aya pd a Karina sa Kariribat odi na Kalobay a giyanan a ikadowa a Sentence na sabap ko mitotongkila (misosopaka) iyan bo a paganay anan a Sentence: “Igira a Sojod so isa rkano na di niyan sowaa so Lagid o Kaplko o Unta”. Aya maana niyan na inisapar o Nabi (S) iba tano psojod sa Lagid o Kalko a unta! na katawan tano a aya Kalko a unta na iphagona niyan daan Tomana so Tomampar sa Una-an a aya Pantag iyan sii ko manosiya na so mbala a Lima niyan na go bo so mbala a Lb iyan. Kataya so Link o Video sa Youtube na Khailay tano ron so Kalko a unta a aya iphagona niyan tomana na so Tomampar sa Una-an a aya Pantag iyan sii ko manosiya na so mbala a Lima niyan na go bo so mbala a Lb iyan: http://www.youtube.com/watch?v=35T7qcnIyiA Na so mipanta ko mga Bangsa tano a mga Salafi na Miyaoparik so mga ala a Ulama iran sa dowa bagi. aya tindg o Kadaklan ko mga ala a Ulama iran a Datar i Shiekh Uthaymeen, go Fauzan, go Binbaz na Aya ipagona Tomana sii ko Sojod na so mbala a Lb na gobo so mbala a Lima, na si Shiekh Al-Bani na aya kpit iyan na aya ipagona na so mbala a Lima na gobo so Mbala a Lb!. وصلى الله على سيدنا محمد كما ذكره الذاكرون و غفل عن كره الغافلون.